والد زيزو: “أنا سكتّ كتير وهكشف أكاذيب الزمالك قريبا” (خاص)

فجّر والد أحمد سيد زيزو، نجم النادي الأهلي، مفاجآت قوية عن فشل تجديد الزمالك مع نجله، مؤكدًا أن مستحقات الأخير لدى الأبيض تصل إلى 82.5 مليون جنيه، بجانب مكافآت بطولة كأس مصر، ولن تتنازل العائلة عن أي جزء من المبلغ المستحق.

إحنا رد فعل ولسة هكشف مفاجآت كبيرة

وقال والد زيزو، في تصريحات لـ “تليجراف مصر”: “إحنا رد فعل ولسة هكشف مفاجآت كبيرة خلال الفترة الجاية، وكل اللي بيحصل هدفه كشف الحقيقة للرأي العام، وعندي مستندات تؤكد حجم المستحقات المتأخرة”.

وأضاف: “زيزو من أكثر اللاعبين وفاءً الذين ارتدوا قميص الزمالك، وده مش كلام بس، ده أفعال أثبتها في مواقف كتير، لكن اللي بيحصل دلوقتي غير مقبول، وإحنا مش هنسيب جنيه واحد”.

وتابع: “اتعرض عليا ملايين من بعض البرامج عشان أتكلم، ورفضت، لأن القضية مش شو، القضية حق، وهكشف قريبًا عن أكاذيب إدارة الزمالك، لأن أنا مش سمسار ولا ليا مصلحة، والكل عارف ده”.

مستندات رسمية وبلاش كذب على الجماهير

وزاد: “إزاي ابني ماضي للأهلي من 6 شهور، والعقود لسة جاية من اتحاد الكرة يوم 2 يونيو؟!، دي مستندات رسمية وبلاش كذب على الجماهير”.

وأتم حديثه قائلًا: “زيزو طول عمره محترف ومخلص لقميص الزمالك، واللي بيحصل دلوقتي محاولة لتشويه صورته قدام الناس، لكن الحقيقة هتظهر قريب جدًا بالأدلة والمستندات”.